Thursday, October 22

५५ दिनदेखि साउदीको सडकमा बास

August 29, 2020 111

दोहा- वैदेशिक रोजगारीका लागि ७ महिनाअघि साउदी अरब पुगेका एक नेपाली युवा सडक जीवन जीउन बाध्य भएका छन् ।

काठमाडौँस्थित साइनिङ स्टार म्यानपावरमार्फत साउदीको अल मल्की कम्पनीमा पुगेका स्याङ्जा पुतली बजार नगरपालिकाका अनिल मिया अलपत्र परेका हुन् ।

 

कम्पनीले २ महिनादेखिको तलब दिएको छैन भने बसेको कोठा पनि छोड भनेपछि उनको बास ५५ दिनदेखि सडकमा छ ।

नेपालबाट एजेन्टले डाईरेक्ट कम्पनीमा भनेर पठाएको र साउदी पुगेपछि सप्लाई कम्पनीमा काम लगाएको तथा काम गर्ने ८ घण्टा भनेकोमा १० घण्टा काम गर्न लगाएको पीडित मियाले बताएका छन् । ड्राइभर भनेर पठाए पनि यहाँ आएपछि ड्राइभर र लेवरको काम गर्नु परेको उनको भनाइ छ ।

मेनपावर कम्पनीले १८ सय साउदी रियाल कमाइ हुने भनेर उनीबाट १ लाख ४० हजार रूपैयाँ लिएको पीडित मियाले बताए । उनले भने, ‘नेपालमा भएको सम्झौताको केहि भएन । हामीले सम्झौता मानेर उनीहरुले भनेजत्ति पैसा दियौँ । अहिले यहाँ यस्तो दु:खको जीन्दगी बिताउनुपरेको छ।’

कम्पनीले २ महिना ११ दिन काम गरेको तलबसमेत नदिएर बिचल्ली पारेको उनले सुनाए । ‘सम्झौता अनुसारको तलब सुविधा नदिने भए काम नगर्ने भनेपछि सम्बन्धित कम्पनीले आफ्नो कोठाबाट निकालेपछि अहिले सडकमा रात बिताउनु परेको छ । मैले समस्या राखेपछि कम्पनीले आधा घण्टा भित्रै कोठा छोडेर जानु भन्यो । कोठा छोड्नुको विकल्प पनि भएन,’ उनले भने ।

यो गुनासो उनले साउदीस्थित नेपाली दूतावासमा पनि गरेको उनले बताए । भने, ‘कम्पनिको मेनेजरलाई जानकारी गराएर नेपालमा सम्झौता गरिए अनुसार सेवा सुविधा नपाएको भन्दै केही राहत हुने हेतुले साउदीस्थित नेपाली दूतावास पनि सुनाए । तर दूतावासले एजेन्टलाई भन्नु हामी केही गर्न सक्दैनौँ ।’

नेपालमा एजेन्टलाई कुरा गर्दा आज गर्छु भोलि गर्छु भन्दै यतिका महिना बितिसक्दा पनि अहिलेसम्म केही नगरेको उनले बताए ।

एजेन्ट र दूतावासले पनि बेवास्ता गरेको कारण विगत ५५ दिनदेखि उनी उद्धारको पर्खाइमा साउदीको सडकमा रात दिन बिताईरहेका छन् ।

यता, उनलाई पठाउने म्यानपावरका प्रतिनिधिलाई सम्पर्क गर्दा उनले लगाएको आरोपमा कुनै सत्यता नभएको भन्दै मियाले आफू खुशी कम्पनीमा काम गर्दागर्दै गाडी सडकमै छोडेर भागेको बताएका छन् ।

मेनपावरका एक प्रतिनिधिले भने, ‘उ अहिले कम्पनी छोडेर बाहिर सडकमा बसेको बारे म्यानपावर कम्पनी जानकार रहेको र उलाई अझै पनि कम्पनीमा काम गर्न गए कम्पनीले काम दिने तथा नगएमा नेपाली दूतावाससँग समन्वय गरी ट्राभल डकुमेन्ट बनाएर स्वदेश फर्काउन पहल गरिने छ ।’

प्रतिकृया दिनुहोस्